धनगढी । धनगढी उपमहानगरपालिका कैलाली जिल्लाभरमै उत्कृष्ट पालिका बनेको छ । प्राकृतिक स्रोत तथा वित्त आयोगद्वारा विभिन्न १७ वटा सूचकमा आधारित रहेर गरिएको कार्यसम्पादन मूल्याङ्कनमा धनगढी जिल्लाकै उत्कृष्ट पालिका बनेको हो ।
जिल्ला समन्वय समिति कैलालीद्वारा शुक्रबार आयोजित नवौँ जिल्ला सभामा जिल्लाभरमै उत्कृष्ट बनेको धनगढी उपमहानगरपालिकालाई सम्मान पत्र प्रदान गरिएको छ ।
सम्मान पत्र धनगढी उपमहानगरपालिकाकी उपप्रमुख कन्दकला रानालाई सभाका प्रमुख अतिथि एवम् सुदूरपश्चिम प्रदेशका मुख्यमन्त्री कमलबहादुर शाहले प्रदान गरेका थिए । सम्मान पत्र प्रदान गर्दै जिल्ला समन्वय समिति कैलालीकी प्रमुख टिका कुमारी चौधरी (भुल)ले उपप्रमुख रानालाई बधाई दिएकी छिन् ।
त्यस्तै, उक्त सम्मान पत्रले आफूहरुलाई थप उर्जा मिलेको धनगढी उपमहानगरपालिकाकी उपप्रमुख रानाले बताएकी छिन् । उनले आगामी दिनमा पनि धनगढी उपमहानगरपालिका उत्कृष्ट हुने प्रतिवद्धता व्यक्त गरेकी छिन् ।
