काठमाडौँ । चैत १५ गते (शुक्रबार) राजावादीको आन्दोलनमा गएका आन्दोलनकारीले गरेको तोडफोड र आगजनीबाट जडीबुटी उत्पादन तथा प्रशोधन कम्पनी लिमिटेडमा २८ करोड बराबरको क्षति भएको पाइएको छ । कम्पनीले गरेको क्षतिको प्रारम्भिक मूल्यांकन अनुसार सो दिन कम्पनीमा २८ करोड बराबरको क्षति भएको पाइएको हो ।
सो दिन कम्पनीको गुड म्यानुफ्याक्चरिङ प्राक्टिस (जीएपपी) सुविधासहितका दुई भवनमा क्षति पुगेको छ ।
त्यसबाहेक उत्पादनमा प्रयोग हुने कच्चा पदार्थ, उपकरण, फर्निचर, कागजात, प्याकेजिङमा प्रयोग हुने सिसि लगायतका सामाग्री नष्ट भएको कम्पनीले जनाएको छ । कम्पनीका अनुसार कम्पनी परिसरमा रहेका एक दर्जन बढी गाडी र मोटरसाइकलसमेत जलेर नष्ट भएका छन् ।
२०३८ सालमा स्थापित भएर सरकारको स्वामित्वमा रहेको उक्त कम्पनीले सन्चो लगायत विभिन्न औषधि उत्पादन गर्ने र जडीबुटीहरुको संकलन र प्रशोधन गर्दै आएको थियो । तर, १५ गते आन्दोलनका क्रममा भएको क्षतिले हाल कम्पनीको सबै उत्पादन बन्द भएको छ । क्षतिपछि कम्पनी पुरानै लयमा फर्कने आशाका साथमा सरसफाइ तथा पुनर्स्थापनाको काम भइरहेको कम्पनीले जनाएको छ ।
