काठमाडौँ । प्राइम सिएको २१औँ वार्षिक उत्सव सम्पन्न भएको छ । सन् २००४ मा स्थापना भएको प्राइम सिएको शनिबार २१औँ वार्षिकोत्सव कार्यक्रम सम्पन्न भएको हो । कार्यक्रममा प्राइम सिएमार्फत सन् २०२४ मा सिए बन्न सफल विद्यार्थी, र्यान्क होल्डर विद्यार्थी, अन्य कलेजका प्राचार्य तथा बोर्डका पदाधिकारीहरुको उपस्थिति रहेको थियो । कार्यक्रमको उद्घाटन संस्थाका अध्यक्ष सिए नवराज बुर्लाकोटीले गरेका थिए ।
कार्यक्रमको उद्घाटन गर्दै बुर्लाकोटीले प्राइम सिएले २१ वर्षे यात्रामा विद्यार्थीहरुको मिहेनत, अभिभावकको सहयोग, योग्य कर्मचारी र दक्ष तथा अनुभवी शिक्षकको योगदानका कारण सिएको प्रत्येक तहमा प्राइमका विद्यार्थीले सर्वोत्कृष्ट नतिजा हासिल गरेको बताएका छन् ।
उनले प्राइम सिएमार्फत ११ सय भन्दा बढी विद्यार्थी सिए बनेको भन्दै सबैप्रति आभार प्रकट गरेका छन् । त्यस्तै, उनले सन् २०२४ मा नेपाल बोर्डबाट सिए हुने ११९ जनामध्ये ७९ जना प्राइमको विद्यार्थी रहेको समेत जानकारी दिएका छन् ।
त्यस्तै, कार्यक्रममा प्राइम सिएमा अध्ययन गरी सन् २०२४ मा उत्तीर्ण भएका विद्यार्थी र सन् २०२४ मा प्रत्येक तहमा र्यान्क होल्डर बन्न सफल विद्यार्थीलाई सम्मान प्रदान गरिएको थियो । सम्मानित विद्यार्थीहरुले पनि प्राइम सिएको उच्चस्तरीय शैक्षिक वातावरण, गुणस्तरीय पाठ्यसामग्री, गुणस्तरीय शिक्षा, दक्ष व्यवस्थापन, अनुभवी तथा खारिएका स्रोत व्यक्तिहरूको सही मार्गदर्शनले आफूलाई लक्ष्य प्राप्त गर्न सहज भएको बताएका छन् ।
प्राइम सिएले आफ्नो २१औँ वार्षिक उत्सवको अवसरमा सिए पढ्न चाहने मेहनती, क्षमतावान विद्यार्थीहरुलाई १०० प्रतिशतसम्म छात्रवृत्तिको व्यवस्था पनि गरेको छ । त्यस्तै, आगामी दिनहरूमा विद्यार्थीहरूको शैक्षिक, व्यावसायिक तथा नेतृत्व विकासका लागि अझ नवीनतम शिक्षण सिकाइ कार्यक्रमहरु, मूल्याङ्कन पद्धतिहरू, तालिम तथा सेमिनारहरू, फरक फरक क्षेत्रका विज्ञहरूद्वारा अतिथि कक्षाहरू सञ्चालन गर्दै जाने प्रतिबद्धता जनाएको छ ।
