काठमाडौँ । कतार सरकारले १८ जना नेपाली कैदीलाई आममाफी दिएको छ । कतारले मुस्लिम धर्मावलम्बीको महान पर्व इदको अवसरमा विभिन्न कसुरमा कैद सजाय भोगिरहेका १८ जना नेपाली कैदीलाई आममाफी दिएको हो ।
इद पर्वको अवसरमा १८ जना नेपाली कैदीलाई आममाफी दिएको भन्दै परराष्ट्र मन्त्रालयले विज्ञप्ति नै जारी गरेर कतार सरकारलाई धन्यवाद दिएको छ ।
कतार सरकारको उक्त निर्णयलाई मन्त्रालयले मानवीय आधारमा गरिएको सौहार्दपूर्ण कदमका रुपमा उल्लेख गरेको छ । त्यस्तै, उक्त निर्णयले नेपाल-कतार द्विपक्षीय सम्बन्धलाई थप सुदृढ गर्नेमा मन्त्रालयले विश्वास व्यक्त गरेको छ ।
नेपाल सरकारले कतारको दोहास्थित नेपाली राजदूतावासमार्फत नेपाली कैदीलाई आममाफीका लागि कतारसँग अनुरोध गरेको थियो । जुन अनुरोधलाई स्वीकार्दै कतारले कतारमा जेल जीवन बिताइरहेको १८ जना नेपालीलाई आममाफी दिएको छ ।
