काठमाडौँ । चितवनमा पहिलोपटक घर बनाउने मेला हुने भएको छ । नव उद्यमीहरूको समूह भी ग्रुप र निर्माण व्यवसायी एस वन होम्सको आयोजना तथा उद्योग वाणिज्य संघ र भरतपुर महानगरपालिकाको समन्वयमा आउँदो वैशाख २५ गतेदेखि २७ गतेसम्म घर बनाउने मेला हुने भएको हो । उक्त मेला नारायणगढमा हुनेछ ।
घर बनाउन चाहिने आवश्यक सामाग्री, सरकारी मापदण्ड र सुरक्षा सम्बन्धी विषयमा जानकारी गराउने उद्देश्य सहित घर बनाउने मेला आयोजना गर्न लागिएको भी ग्रुपका अध्यक्ष विपिन कँडेलले जानकारी दिए । ‘चितवन देशकै केन्द्रबिन्दु पनि हो । त्यसैलाई लक्षित गरेर उपभोक्तालाई सम्पूर्ण जानकारी दिने उद्देश्यसहित मेला आयोजना गर्न लागेका हौँ ।’, उनले भने ।
मेलामा घर तथा भवन निर्माण गर्दा चाहिने सामाग्रीको जानकारीका दिनुका साथै घरजग्गा किनबेच गर्न खरिदकर्ता र बिक्रेताबीच पनि भेट गराइने कँडेलले बताएका छन् । उनका अनुसार मेलामा सरकारी सरोकारवाला निकाय, व्यवसायी, विज्ञ र उपभोक्ताबीच परामर्श, अभिमुखीकरण, अन्तरक्रिया लगायतका कार्यक्रम हुनेछन ।
‘हामीले उपभोक्तालाई घर तथा भवन बनाउन के कस्ता निकायहरुसंँग समन्वय र स्वीकृति लिनुपर्छ र कम लागतमा अधिकतम गुणस्तरीय सेवा कसरी लिन सकिन्छ ? भन्ने विषयमा जानकारी दिनु पनि हाम्रो उद्देश्य हो ।’, कँडेलले भने । घरजग्गा कारोबार तथा निर्माण र निर्माण सामाग्री बिक्रेता र सेवाग्राहीलाई एउटै छाता मुनी राखेर सबै प्रकारका सेवा तथा जानकारी गराउने उद्देश्यले मेला आयोजना गर्न लागिएको एसवन होम्सका अध्यक्ष सुरज न्यौपानेले जानकारी दिएका छन् । ‘यो मेलाले व्यवसायी र सेवाग्राहीबीच प्रत्यक्ष भेटघाट गराउँछ ।’, न्यौपानेले भने ।
त्यस्तै, उद्योग वाणिज्य संघ चितवनको परिसरमा हुने मेलामा घरजग्गा, निर्माण सामाग्री, लगायतका गरी २५ वटा स्टल रहनेछन् । तीन दिनसम्म चल्ने मेलामा १० हजार अवलोकनकर्ताले अवलोकन गर्ने न्यौपानेको भनाई छ । मेलाले निर्माण कम्पनी, निर्माण सामाग्री उत्पादक, घरजग्गा व्यवसायी, इन्जिनियर, उपभोक्ता, सर्वसाधारण, विद्यार्थीहरूलाई फाइदा पुग्ने उनको भनाई छ । मेलामा निःशुल्क प्रवेश पासको व्यवस्था गरिएको छ ।
