काठमाडौँ । भण्डारी सेवा समाज नेपाल (रघुवंशी, कौशिक गोत्रीय)को मोरङ जिल्ला सम्मेलन सम्पन्न भएको छ । मोरङको होक्लाबारीमा समाजको प्रथम मोरङ जिल्ला सम्मेलन सम्पन्न भएको हो ।
समाजका ज्येष्ठ सदस्य भक्त बहादुर भण्डारीको अध्यक्षमा सम्पन्न भएको उक्त सम्मेलनमा समाजको केन्द्रीय उपाध्यक्ष एवम् मधेश प्रदेश इन्चार्ज कुमार भण्डारी, केन्द्रीय सदस्य देवी बहादुर भण्डारी, भक्तपुर जिल्ला अध्यक्ष परीन्द्र भण्डारी र समाजका बुद्धिजिवी सूर्य बहादुर भण्डारी लगायतको उपस्थिति रहेको थियो । सम्मेलनको सञ्चालन रबिन भण्डारीले गरेका थिए ।
सम्मेलनले देबेन्द्र भण्डारीको अध्यक्षतामा १३ सदस्यीय कार्यसमिति चयन गरेको छ भने टेक बहादुर भण्डारीको संयोजकत्वमा ९ सदस्यीय सल्लाहकार समिति समेत गठन गरेको छ ।
सम्मलेनको सम्बोधन गर्दै समाजका केन्द्रीय उपाध्यक्ष कुमार भण्डारीले हालसम्म भण्डारी सेवा समाज नेपालले (रघुवंशी, कौशिक गोत्रीय)ले देशभरका ५६ जिल्लाका भण्डारी दाजुभाईलाई समेटिसकेको बताएका छन् । उनले २०६५ असोज ३ गते स्थापना भएको उक्त समाज रघुवंशी कौशिक गोत्रीय दाजुभाइहरुको साझा संस्था भएको पनि बताएका छन् ।
त्यस्तै, उनले संस्थाले भण्डारी दाजुभाईको स्वास्थ्य, शिक्षाको क्षेत्रलाई पहिलो प्राथमिकता दिएर काम गरिरहेको र हालसम्म पाँचवटा अस्प्तालमा सम्झौता गरिसक्नुका साथै विभिन्न शीर्षकमा ५० प्रतिशतदेखि १५ प्रतिशतसम्म उपचार छुटको समेत व्यवस्था गरेको जानकारी दिएका छन् । यता समाजका केन्द्रिय सदस्य देवी बहादुर भण्डारीले देशभर छरिएर रहेका रघुवंशी कौशिक गोत्रीय दाजुभाईहरुलाई एक भएर अघि बढ्नका लागि आह्वान समेत गरेका छन् ।
