काठमाडौँ । बैंकका हाकिमले भनेको गर्दा भर्खर जागिर खाएकि जुनियर म्यानेजमेन्ट ट्रेनी अख्तियारको फन्दामा परेकी छिन् । पतञ्जली योग पीठ तथा आयूर्वेद कम्पनी नेपालको जग्गा हिनामिना प्रकरणमा तत्कालिन सनराइज बैंककी जुनियर म्यानेजमेन्ट ट्रेनी एशु मैनाली अख्तियारको फन्दामा परेकी हुन् ।
उक्त जग्गा प्रकरणमा पूर्वप्रधानमन्त्री माधवकुमार नेपालसहित ९३ जनाविरुद्ध मुद्दा दर्ता हुँदा उनलाई पनि प्रतिवादी बनाइएको छ । काभ्रेपलान्चोक घर भएकी ३८ वर्षीय ट्रेनी एशु मैनालीलाई प्रतिवादी बनाइएको हो । उनी तत्कालीन सनराइज बैंक (हाल लक्ष्मी सनराइज) मा ट्रेनीको रूपमा कार्यरत थिइन् ।
ट्रेनी पद बैंकको कर्मचारी बन्न प्रवेशको प्रारम्भिक ओहदा मानिन्छ । यो पदमा रहेर सामान्यता कुनै पनि नीतिगत निर्णयहरु गर्न पाइँदैन र हुँदैन पनि । तर, हाकिमले भनेकै आधारमा काम गर्दा उनी फसेकी छिन् ।
सो जग्गा हिनामिना प्रकरणमा उनीसहित बैंकका दर्जनौँ कर्मचारीबिरुद्द भ्रष्टाचार मुद्दा दायर भएको छ ।
