काठमाडौँ । कुखुराको मासुको मूल्य घटेको छ । जेठ १९ गतेदेखि लागू हुने गरी बोइलर कुखुराको मासुको मूल्य घटेको हो ।

राष्ट्रिय कुखुरा बिक्री व्यवसायी संघका अनुसार कुखुराको मासुको मूल्य किलोमा १० देखि १५ रुपैयाँसम्मले घटेको छ । जिउँदो कुखुराको मूल्य प्रतिकिलो १० रुपैयाँले घटेर २ सय ४० रुपैयाँ कायम छ । यसअघि जिउँदो कुखुराको प्रतिकिलो मूल्य २ सय ५० रुपैयाँ थियो ।

त्यस्तै, तयारी मासुको मूल्य किलोमा १५ रुपैयाँले घटेको छ । मूल्य घटेसँगै यसअघि ३ सय ५० रुपैयाँ रहेको तयारी मासुको मूल्य ३ सय ३५ रुपैयाँ कायम भएको संघले जनाएको छ ।

गर्मी मौसममा मागभन्दा बढी उत्पादन भएका कारण मासुको मूल्य घटेको व्यवसायीहरुले बताएका छन् ।