काठमाडौँ । सेयर बजारका लगानीकर्ता दिपेन्द्र अग्रवाललाई प्रहरीले नियन्त्रणमा लिएपछि कलाकार दिपकराज गिरीले सामाजिक सञ्जाल फेसबुकमा व्यङ्ग्य गरेका छन् ।
उनले फेसबुकमा ‘मेस्सी पक्राउ’ लेख्दै व्यङ्ग्य गरेका हुन् । सोही पोष्टमा गिरीले ‘सेयर बजार’ पनि लेखेका छन् । यसले उनको पोष्ट दिपेन्द्र अग्रवाललाई नियन्त्रणमा लिइएको विषयमै केन्द्रित रहेको प्रष्ट पार्छ ।
अग्रवाललाई सोमबार प्रहरीले काठमाडौँको टोखाबाट नियन्त्रणमा लिएको हो । उनलाई आपराधिक लाभ तथा ठगी कसुरमा नियन्त्रणमा लिइएको प्रहरीले जनाएको छ ।
प्रहरीका अनुसार अग्रवालविरुद्ध केही दिनअघि नै अदालतबाट पक्राउ पुर्जी जारी भएको थियो । तर, उनको लोकेसन थाहा नहुँदा प्रहरीले अग्रवाललाई नियन्त्रणमा लिन सकेको थिएन । तर, सोमबार उनी कहाँ छन् ? भन्ने सुराकीका आधारमा नियन्त्रणमा लिइएको प्रहरीले जनाएको छ ।
