काठमाडौँ । रसुवामा आएको भीषण बाढीमा परेर १८ जना बेपत्ता भएका छन् । जिल्ला प्रहरी कार्यालय रसुवाका अनुसार गएराति आएको बाढीमा परेर हालसम्म प्रहरी र कामदार गरी कुल १८ जना बेपत्ता भएका छन् ।

बेपत्ता हुनेहरुमा तीन जना प्रहरी, ९ जना नेपाली कामदार र ६ जना चिनियाँ कामदार रहेका छन् । 

बेपत्ता भएका तीन जना प्रहरी उद्धारमा खटिएका थिए । जिल्ला प्रहरी कार्यालयका अनुसार बेपत्ता हुनेमा इलाका प्रहरी कार्यालय टिमुरेका प्रहरी सहायक निरीक्षक लालबहादुर श्रेष्ठ, प्रहरी जवान मुन्ना ठाकुर र लोकेन्द्र बोहरा रहेका छन् । 

अचानक आएको बाढीमा फसेका ९ जनाको भने उद्धार गरिएको छ । बाढीले नेपाल-चीन जोड्ने मितेरी पुल बगाएको छ । हाल उद्धारमा नेपाल प्रहरी, सशस्त्र प्रहरी, नेपाली सेनाको टोली र स्थानीयहरु खटिएका छन् । बाढीकै कारण विभिन्न आयोजनाहरुमा क्षति पुग्दा कुल २०० मेगावाट बिजुली उत्पादन बन्द भएको छ ।