काठमाडौँ । नेकपा एमालेका सचिव एवम् सांसद योगेश भट्टराईले कुनै नेताको भोट बढाउनका निम्ति अब विमानस्थलहरु बन्न नहुने बताएका छन् । बिहीवार बसेको अन्तराष्ट्रिय सम्बन्ध र पर्यटन समितिको बैठकमा बोल्दै उनले यस्तो बताएका हुन् । 

समितिमा भएको नेपाल हवाई सेवा प्राधिकरण विधेयक, २०८१ माथि माननीय संशोधनकर्ताहरूसँग छलफलमा उनले नेपालमा ५५ वटा विमानस्थलहरु रहेको र त्यसमध्ये सञ्चालनमा ३२ वटा मात्रै रहेको बताए । सरकारले नीति तथा कार्यक्रममा अहिले पनि विमानस्थल थप्ने कुरा ल्याउनु उचित नरहेको भट्टराईको भनाई छ । 

अब विमानस्थल थप्ने कुरा फेसन भएकाले राजनीतिक दबाबमा विमानस्थल थप्न नहुने र भएकालाई व्यवस्थित बनाइ विस्तार गर्न जरुरी रहेको भट्टराईले बताएका छन् । उनले अन्तराष्ट्रिय एयरपोर्ट मात्रै अबको प्राथमिकतामा पर्नुपर्ने बताएका छन् । 

सचिव भट्टराईका अनुसार १९४९ मा पहिलो पटक नेपालमा हवाई सेवा शुरु भएको थियो । त्यसपछि हालसम्म १०८ वटा दुर्घटना भएका छन् । जसबाट ९५९ जनाको ज्यान गएको छ । उनले अब दुर्घटना हुन नदिने गरी ऐन बनाउनुपर्नेमा जोड दिएका छन् ।