काठमाडौँ । पछिल्लो समय आर्थिक अपराधमा वृद्धि भएको पाइएको छ । जिल्ला प्रहरी परिसर काठमाडौँका अनुसार सबैभन्दा बढी मुद्दा दर्ता बैकिङ कसुरमा हुने गरेका छन् ।
जिल्ला प्रहरी परिसर काठमाडौँका प्रमुख प्रहरी वरिष्ठ उपरीक्षक विश्व अधिकारीले मुख्य १० वटा सबैभन्दा बढी दर्ता भएको मुद्दालाई विश्लेषण गर्दा बैकिङ कसुर पहिलो नम्बरमा रहेको बताएका छन् ।
बुधवार परिसरमा आयोजित पत्रकार सम्मेलनमा उनले गत आर्थिक वर्ष २०८१/८२ मा ६ हजार ५ सय ५३ वटा मुद्दाहरु बैकिङ कसुरका दर्ता भएको जानकारी दिएका छन् । गतवर्ष १२ हजार ९ सय १५ वटा मुद्दा दर्ता भएका थिए । अधिकारीका अनुसार बैकिङ कसुरपछि अभद्र व्यवहारका मुद्दा १ हजार ९ सय ५३ वटा रहेका छन् ।
बैंकिङ कसुर र अभद्र व्यवहारपछि क्रमशः चोरी, ठगी, लागूऔषध, आत्महत्या, जबर्जस्तीकरणी, ज्यान मार्ने उधोग, सवारी ज्यान र अंगभंगका घटनाहरु रहेको अधिकारीले बताएका छन् । उनका अनुसार गत आर्थिक वर्षमा चोरीका ९५१, ठगीका ७४७, लागूऔषधका ४३१, आत्महत्याका ३३२, जबर्जस्ती करणी २४४, ज्यान मार्ने उधोग १४०, सवारी ज्यान १०० र सवारी अङ्गभङग ७४ वटा मुद्दा दर्ता भएका छन् ।
औसतमा दैनिक ३५ वटा मुद्दा दर्ता भएको देखिएको प्रहरीले जनाएको छ । प्रहरीका अनुसार १० प्रकारका मुख्य संख्याका अपराधहरुले जम्मा मुद्दाको ८९ प्रतिशत हिस्सा ओगटेका छन् ।
