काठमाडौँ । मृगौला बेचबिखनमा संलग्न गिरोहलाई प्रहरीले पक्राउ गरेको छ । नेपाल प्रहरीको मानव अनुसन्धान बेचबिखन ब्युरोले मृगौला बेचबिखन गर्ने ७ जनाको गिरोहलाई पक्राउ गरिएको जनाएको हो ।
नयाँ दिल्लीमा बसेर अवैध रुपमा मृगौला बेच्ने कार्यमा संलग्न सिन्धुपाल्चोकका श्यामकृष्ण भण्डारी र उनको सहयोगी सुजन भारतीलाई पक्राउ गरिएको ब्युरोले जनाएको छ । ब्युरोका अनुसार भण्डारीलाई महेन्द्रनगर र भारतीलाई वीरगञ्जबाट पक्राउ गरी सङ्गठित अपराध अन्तर्गत कारवाही अघि बढाइएको छ ।
सो गिरोहले पैसाको प्रलोभनमा पारेर काठमाडौँ, नुवाकोट, काभ्रपलाञ्चोक, धादिङलगायतका सर्वसाधारणलाई भारतको नयाँ दिल्ली पुर्याएर गैरकानूनी रुपमा मृगौला झिकी बेच्ने गरेको पाइएको प्रहरीले जनाएको छ ।
ब्युरोका प्रमुख प्रहरी वरिष्ठ उपरीक्षक कृष्णप्रसाद पंगेनीका अनुसार गत साउन २० गते ३ जनालाई पक्राउ गरेर प्रहरीले अनुसन्धान थालेको थियो । सो गिरोहलाई संगठित अपराध ऐन अन्तर्गत कारबाही प्रारम्भ गरिएको पनि पंगेनीले बताएका छन् । सो ऐन अन्तर्गत मानव बेचविखन र गैरकानूनी रुपमा अंग बेचविखनमा संलग्नलाई १० वर्ष कैद र २ लाख रुपैयाँसम्म जरिवाना गर्ने व्यवस्था रहेको पनि प्रहरी वरिष्ठ उपरीक्षक पंगेनीले जानकारी दिएका छन् ।
