काठमाडौँ । नेकपा एमालेका सांसद सूर्यबहादुर थापा क्षेत्रीले सरकारी कोषहरु कामका लागि भन्दा पनि देखाउनका लागि बनाइने गरिएको बताएका छन् । अर्थ समितिमा वैकल्पिक विकास वित्तसम्बन्धी विधेयकमाथिको छलफलमा उनले देखाउनका लागि बनाइएका कोषहरुको अर्थ नरहेको बताएका छन् । 

उनले वैकल्पिक वित्त कोष पनि त्यसैको नमूना हुनसक्ने जोखिम रहेको बताएका छन् । सांसद थापाले वैकल्पिक पुँजी संरचना बनाएर मात्रै कोषलाई परिचालन गर्नुपर्ने बताएका छन् ।

‘सरकारी कोषहरु कामका लागि भन्दा पनि देखाउनका लागि बनाइने गरिएका छन् । वैकल्पिक विकास वित्त परिचालनसम्बन्धी कोषको पुँजी संरचना के आधारमा बनाइयो, यसको लजिक चाहियो ।’, उनले भने, ‘वैकल्पिक वित्त कोष भनेर नाम दिने तर अहिलेको पुँजी संरचनाले वैकल्पिक भन्ने देखाउन्न ।’

त्यस्तै, सांसद थापाले स्रोतको खोजी गर्दा बढिमा कतिसम्मको खोजी गरिरहेका छौँ भन्नेमा पनि कानून बनाउँदा स्पष्ट हुन जरुरी रहेको बताएका छन् ।