काठमाडौँ । ब्रोइलर कुखुराको मासुको मूल्य फेरि बढेको छ । राष्ट्रिय कुखुरा व्यवसायी संघले उत्पादन कम भएको भन्दै मासुको मूल्य बढाएको हो ।

यसो त यसअघि संघले साउन १५ गतेदेखि लागू हुनेगरि मासुको मूल्य बढाएको थियो । तर, सो मूल्य लागू भएको ३ दिन पनि नबित्दै संघले मासुको मूल्य फेरि बढाएको छ । 

हाल संघले जिउँदो कुखुराको मूल्य प्रतिकिलो १० रुपैयाँ र तयारी मासुको मूल्य प्रतिकिलो १५ रुपैयाँले बढाएको छ । योसँगै बजारमा जिउँदो कुखुराको मूल्य प्रतिकिलो २ सय ५० रुपैयाँ पुगेको छ भने तयारी मासुको मूल्य प्रतिकिलो ३ सय ५० रुपैयाँ पुगेको छ । 

यसअघि असारमा मात्र जिउँदो कुखुराको मासुको मूल्य प्रतिकिलो २ सय २० रुपैयाँ र तयारी मासुको मूल्य प्रतिकिलो ३ सय २० रुपैयाँ थियो । यसो त साउन महिनामा अन्य महिनाको तुलनामा मासुको खपत कम हुन्छ । खपत कम हुँदा मूल्य पनि सस्तो हुने गरेको थियो । तर, यसपालि उत्पादन साह्रै न्यून भएको भन्दै संघले साउन महिनामै मासुको मूल्य दुईपटक बढाएको छ ।