काठमाडौँ । नारायणी डेभलपमेन्ट बैंक लिमिटेडले असोज २ गतेदेखि शतप्रतिशत हकप्रद सेयर निष्कासन गर्ने भएको छ । बैंकले हाल कायम २६ करोड २४ लाख ६७ हजार ६ सय रुपैयाँ चुक्ता पूँजीको आधारमा प्रतिसेयर १०० रुपैयाँ अंकित मूल्यका २६ लाख २४ हजार ६७६ कित्ता हकप्रद सेयर जारी गर्न लागेको हो ।
यसका लागि बैंकले भदौ ९ गते एक दिन बुक क्लोज गरेको थियो । बुकक्लोज मितिअनुसार भदौ ८ गतेसम्म कायम सेयरधनीहरुले मात्र हकप्रद सेयर खरीद गर्न सक्नेछन् । हकप्रद सेयर असोज २२ गतेसम्म निष्कासनमा रहनेछ ।
बैंकले निष्कासनका लागि गराएको रेटिङ्गमा इक्रा नेपालले ‘इक्राएनपी इस्यूअर सी प्लस’ प्रदान गर्दै समयमा वित्तीय दायित्व बहन गर्ने क्षमतामा उच्च जोखिम रहेको संकेत गरेको छ ।
हकप्रद सेयरको बिक्री प्रबन्धकमा ग्लोबल आइएमई क्यापिटल लिमिटेड रहेको छ । साथै, ग्लोबल आइएमई बैंकको भुमही शाखा, नारायणी डेभलपमेन्ट बैंकको केन्द्रीय कार्यालयसहित यज्ञपुरी, टाँडी, पर्सा र नारायणगढ शाखाबाट पनि आवेदन दिन सकिनेछ ।
यसका अतिरिक्त, नेपाल धितोपत्र बोर्डबाट अनुमति प्राप्त सम्पूर्ण आस्बा सदस्य बैंक तथा वित्तीय संस्था र तिनका तोकिएका शाखा कार्यालयमार्फत साथै ‘मेरो शेयर’ अनलाइन प्रणालीमार्फत समेत आवेदन दिन सकिने व्यवस्था गरिएको छ ।
शतप्रतिशत हकप्रद निष्कासन र बाँडफाँटपछि बैंकको चुक्ता पूँजी ५२ करोड ४९ लाख ३५ हजार २०० रुपैयाँ पुग्नेछ । संकलित रकम भौतिक पूर्वाधार विस्तार, दुई नयाँ शाखा विस्तार, साथै धितोपत्र, सरकारी ऋणपत्र तथा म्युचुअल फण्डमा लगानी गरिने बैंकले जानकारी दिएको छ ।
