काठमाडौँ । भण्डारी सेवा समाजले सावित्रा भण्डारी (साम्बा)लाई सम्मान गरेको छ । समाजले काठमाडौँमा एक कार्यक्रमको आयोजना गर्दै साम्बालाई सम्मानित गरेको हो ।
नेपाली महिला राष्ट्रिय फूटबल टिमकी कप्तानसमेत रहेकी भण्डारीले फुटबल खेलमार्फत नेपाललाई अन्तराष्ट्रिय स्तरमा चिनाएको भन्दै सम्मानित गरिएको समाजका केन्द्रीय अध्यक्ष वीरबहादुर भण्डारीले बताएका छन् । उनलाई पञ्चेबाजाले स्वागत गर्दै दोसल्ला र नगदसहित ‘भण्डारी राष्ट्रिय गौरव’बाट सम्मानित गरिएको छ ।
कार्यक्रममा समाजले साम्बालाई आजीवन सदस्यतासमेत प्रदान गरेको छ । सम्मान कार्यक्रममा बोल्दै साम्बाले आफ्नो सफलताको कारण आफू एक्लै नभएर सम्पूर्ण नेपालीको साथ भएको बताएकी छिन् ।
उनले आफूले सुरुमा मोजाको भकुन्डो बनाएर फुटबल सिकेको अनुभव सुनाइन् । सीमित स्रोत र साधनकाबीच पनि आफूले फुटबल खेलेको भन्दै पछिल्लो समय युवाहरुमा फुटबलप्रति आकर्षण बढेको साम्बाले बताएकी छिन् । उनले आगामी दिनमा भण्डारी सेवा समाजसँग मिलेर अगाडि बढ्ने प्रतिबद्धतासमेत व्यक्त गरेकी छिन् ।
त्यस्तै, कार्यक्रममा बोल्दै समाजका केन्द्रीय अध्यक्ष वीर बहादुर भण्डारीले इतिहासमा पनि भण्डारीहरुको भूमिका महत्वपूर्ण रहेको भन्दै स्वदेशमा मात्र नभएर विदेशमा समेत देशको प्रतिष्ठा बढाएको भन्दै साम्बाको प्रशंसा गरेका छन् । यता समाजका प्रमुख संरक्षक जीवन भण्डारीले साम्बालाई राष्ट्रिय झण्डा ओढाएर सम्मान गरेका थिए । कार्यक्रममा भण्डारी सेवा समाजका संस्थापक अध्यक्ष, बरिष्ठ उपाध्यक्ष, उपाध्यक्षलगायतले साम्बालाई धन्यवादसँगै आगामी सफलताको शुभकामनासमेत प्रदान गरेका थिए ।
