काठमाडौँ । सर्वोत्तम सिमेन्टको नाफा बढेको छ । कम्पनीले प्रकाशित गरेको गत आर्थिक वर्षको चौथो त्रैमाससम्मको अपरिस्कृत वित्तीय विवरण अनुसार कम्पनीको खुद नाफा ५७२.५२ प्रतिशतले बढेको हो ।
यस अवधिमा कम्पनीले कुल १ अर्ब ४५ लाख रुपैयाँ खुद नाफा कमाएको छ । जबकी कम्पनीले अघिल्लो आर्थिक वर्षको सोही अवधिमा १४ करोड ९३ लाख रुपैयाँ खुद नाफा कमाएको थियो ।
गत आर्थिक वर्षमा कम्पनीको बिक्री आम्दानी बढेसँगै खुद नाफा पनि उल्लेख्य बढेको हो । समीक्षा अवधिमा कम्पनीको बिक्री आम्दानी ४९.८७ प्रतिशतले बढेर ९ अर्ब ५५ करोड रुपैयाँ पुगेको छ ।
कम्पनीले प्रकाशित गरेको वित्तीय विवरण अनुसार कम्पनीको कुल नाफा १७३.०१ प्रतिशत बढेको छ भने अन्य आम्दानी २१८.०२ प्रतिशत बढेको छ । कम्पनीको कुल खर्च पनि ५४.३८ प्रतिशत बढेको छ ।
समीक्षा अवधिमा कम्पनीको नाफासँगै प्रतिसेयर आम्दानी (इपिएस) पनि बढेको छ । यस अवधिमा कम्पनीको इपिएस १६ रुपैयाँ ९८ पैसा बढेर २० रुपैयाँ १९ पैसा पुगेको छ । यस अवधिमा कम्पनीको प्रतिसेयर नेटवर्थ २०२ रुपैयाँ रहेको छ । ४ अर्ब ९७ करोड ५५ लाख रुपैयाँ चुक्ता पूँजी रहेको यस कम्पनीको अन्य इक्विटी ४ अर्ब ७३ करोड ७९ लाख रुपैयाँ रहेको छ ।
