काठमाडौँ । स्वस्तिक लघुवित्त वित्तीय संस्थाले साउन ३० गतेदेखि आईपीओ निष्कासन गर्ने भएको छ । लघुवित्तले पहिलो चरणमा वैदेशिक रोजगारीमा रहेका नेपालीहरुका जारी गरेको आईपीओ बाँडफाँडपश्चात अब सर्वसाधारणका लागि आईपीओ निष्कासन गर्न लागेको हो ।
लघुवित्तलाई धितोपत्र बोर्डले जारी पूँजीको ४० प्रतिशत अर्थात २ करोड ३१ लाख रुपैयाँ बराबरको २ लाख ३१ हजार कित्ता सेयर निष्कासन गर्ने अनुमति दिएको थियो ।
त्यसमध्ये लघुवित्तले पहिलो चरणमा १ हजार १ सय ५५ कित्ता सेयर कर्मचारीका लागि, ११ हजार ५ सय ५० रुपैयाँ कित्ता सेयर सामूहिक लगानी कोष र २३ हजार १ सय कित्ता सेयर वैदेशिक रोजगारीमा रहेका नेपालीहरुका निष्कासन गरेको थियो ।
हाल भने लघुवित्तले सर्वसाधारणका लागि प्रतिकित्ता १०० रुपैयाँ अंकित मूल्यका दरले १ करोड ९५ लाख १९ हजार ५ सय रुपैयाँ बराबरको १ लाख ९५ हजार १ सय ९५ कित्ता सेयर निष्कासन गर्न लागेको छ । उक्त आईपीओमा छिटोमा भदौ ३ र ढिलोमा भदौ १३ गतेसम्म आवेदन दिन सकिनेछ । आईपीओमा न्यूनतम १० कित्ता र अधिकतम ५ हजार कित्ताका लागि आवेदन दिन सकिनेछ ।
आईपीओ निष्काशनका लागि गराएको रेटिङ्गमा इक्रा नेपालले लघुवित्तलाई इक्राएनपी इस्यूअर रेटिङ्ग बी एटदरेट प्रदान गरेको छ । यसले लघुवित्तको समयमा वित्तीय दायित्व पूण गर्न सक्ने अवस्थामा उच्च जोखिम रहेको संकेत गर्दछ । लघुवित्तको धितोपत्र निष्काशन तथा बिक्री प्रबन्धक नबिल इन्भेष्टमेन्ट बैंकिङ्ग लिमिटेड रहेको छ ।
