काठमाडौँ । सरकारले पोखरा अन्तराष्ट्रिय विमानस्थल र भैरहवा स्थित गौतमबुद्ध अन्तराष्ट्रिय विमानस्थलबाट हुने अन्तराष्ट्रिय उडानलाई आकर्षित गर्न हवाइ भाडामा लाग्दै आएको विभिन्न शुल्कमा छुट दिने निर्णय गरेको छ । संस्कृति, पर्यटन तथा नागरिक उड्डयन मन्त्रालयले प्रेस विज्ञप्ति जारी गर्दै मन्त्रिपरिषद्को निर्णयअनुसार २०८३ साल भदौ मसान्तसम्मका लागि विभिन्न ४ प्रकारका शुल्कमा छुट तथा सहुलियत प्रदान गरिएको जनाएको हो ।
मन्त्रालयले जारी गरेको विज्ञप्तिमा गौतमबुद्ध अन्तराष्ट्रिय विमानस्थल र पोखरा विमानस्थलबाट हुने अन्तराष्ट्रिय उडानमा विभिन्न ४ शीर्षकमा छुट दिने निर्णय भएको उल्लेख छ ।
अन्तराष्ट्रिय उडानका हवाई टिकटमा लाग्ने प्रति यात्रु ३ हजार रुपैयाँको यात्रु सेवा शुल्क पूर्ण छुट हुने भएको छ । हवाई टिकटमा लाग्ने प्रति यात्रु १ हजार रुपैयाँ बराबरको पर्यटन शुल्क पनि पूर्ण रूपमा छुट हुने भएको छ ।
यी विमानस्थलहरूमा अन्तराष्ट्रिय उडान भर्ने जहाजहरूका लागि लाग्ने पार्किङ, ल्यान्डिङ र न्याभिगेसन (सञ्चार तथा उड्डयन सहायता) शुल्क पनि पूर्ण रूपमा छुट गरिएको छ । विमानस्थलमा अन्तराष्ट्रिय उडानका लागि आवश्यक पर्ने ग्राउन्ड ह्यान्डलिङ सेवाको शुल्कमा ७५ प्रतिशत छुट प्रदान भएको छ ।
मन्त्रालयका सह प्रवक्ता गोकर्ण प्रसाद उपाध्यायका अनुसार सरकारको यो निर्णयले अन्तराष्ट्रिय वायुसेवा कम्पनीहरूका लागि यी दुई विमानस्थलमा उडान सञ्चालन गर्न लाग्ने खर्च उल्लेख्य रूपमा घट्नेछ ।
