काठमाडौँ । नेपाल बीमा प्राधिकरणका तत्कालीन अध्यक्ष शरद ओझा बर्खास्तीमा परेपछि सरकारले नयाँ अध्यक्ष नियुक्ति प्रक्रिया अघि बढाएको छ । मन्त्रिपरिषद् बैठकले प्राधिकरणको नयाँ अध्यक्ष नियुक्तिका लागि तीन सदस्यीय सिफारिस समिति गठन गरेको छ ।
सरकारले गठन गरेको सिफारिस समितिको नेतृत्व राष्ट्रिय योजना आयोगका उपाध्यक्ष प्रा.डा. शिवराज अधिकारीले गर्नेछन् भने समितिमा अर्थसचिव घनश्याम उपाध्याय र डा. खेमराज खरेल सदस्य छन् ।
गत फागुन १२ गते प्राधिकरणको अध्यक्ष बनेका तत्कालीन अध्यक्ष ओझालाई सरकारले भदौ २ गते बर्खास्त गरेको थियो । उनले अध्यक्ष बन्न पेश गरेको योग्यता र अनुभवको कागज नै फर्जी भएको पुष्टि भएपछि सरकारले उनलाई पदबाट बर्खास्त गरेको थियो । योग्यता र अनुभवमाथि प्रश्न उठेपछि गठन गरिएको न्यायिक समितिले ओझाले बुझाएको कागज फर्जी भएको ठहर गरेको थियो ।
तर, सोही फर्जी कागज प्रकरणमा कारवाही गर्नुपर्ने व्यक्तिलाई नै सरकारले पुनः अध्यक्ष छान्ने जिम्मा दिएको छ ।
हाल सरकारले गठन गरेको सिफारिस समितिका संयोजक प्रा.डा. शिवराज अधिकारी यसअघि पनि प्राधिकरणको अध्यक्ष नियुक्तिका लागि गठन गरिएको सिफारिस समितिको संयोजक थिए । उनैले प्राधिकरणको अध्यक्षमा ओझाको नाम सिफारिस गरेका थिए । तर, उनै ओझा फर्जी कागज बुझाएर अध्यक्ष बनेको ठहर भएपछि बर्खास्तीमा परेका छन् । सो प्रकरणमा फर्जी कागजका आधारमा अध्यक्षका लागि सिफारिस गर्ने व्यक्तिलाई कारवाही हुनुपर्ने आवाज उठिरहेका बेला सरकारले उनैलाई पुनः अध्यक्ष छान्ने जिम्मा दिएपछि धेरैले यसको खुलेरै विरोध गरेका छन् ।
तत्कालीन अध्यक्ष ओझा बर्खास्तीमा परेपछि अहिले अर्थ मन्त्रालयका सहसचिव सेवन्तक पोखरेलले बीमा प्राधिकरणको अध्यक्षका रुपमा काम गर्दै आएका छन् ।
