काठमाडौँ । उत्तरी इटालीको बारोलो वाइन क्षेत्रमा नेब्बिओलो अंगुर पाक्ने समय नजिकिँदै गर्दा संयुक्त राज्य अमेरिकाले इटालियन वाइनमाथि लगाएको १५ प्रतिशत नयाँ करले वाइन निर्माताहरूलाई संकटमा पारेको छ । यो क्षेत्रको सबैभन्दा ठूलो निर्यात बजार अमेरिकामा गत वर्ष २ अर्ब युरो (लगभग २.३ अर्ब डलर) को वाइन बिक्री भएको थियो तर नयाँ करले व्यापारमा अनिश्चितता ल्याएको छ ।
ला मोर्रास्थित डोसियो भिग्नेटी वाइनरीमा हजारौँ बोतल वाइन अमेरिकी ग्राहकहरूले महिनौँअघि अर्डर गरेको तर डेलिभरी हुन नसकेर भण्डारणमा थुप्रिएका छन् । वाइनरीका अन्तराष्ट्रिय व्यापार प्रबन्धक फ्रान्सेस्को डाभिकोले भने, ‘राष्ट्रपति ट्रम्पको बारम्बार बदलिने नीतिले अमेरिकी ग्राहकहरू अर्डर लिन र भुक्तानी गर्न हिचकिचाइरहेका छन् । बजार अझै अप्रत्याशित छ ।’
सेरालुंगा डी आल्बाका गुइडो पोरो वाइनरीका प्रमुख फाबियो पोरोले मूल्य वृद्धि गर्न नचाहे पनि करको बोझले ग्राहकहरूले कम वाइन किन्ने जोखिम रहेको बताए । ‘हामी वाइन बनाउने भएकाले बढी प्रभावित छौँ ।’, उनले भने ।
बारोलो क्षेत्रका पर्यटन व्यवसायी सर्जियो बेनेडेटोले अमेरिकी बजारमा निर्भर हुनु जोखिमपूर्ण भएको भन्दै वैकल्पिक बजार खोज्नुपर्ने सुझाव दिएका छन् । इटालियन वाइन उद्योग संगठन फेडेरभिनीका अनुसार अमेरिका इटालियन वाइनको सबैभन्दा ठूलो बजार हो र यो करले समग्र निर्यातमा ठूलो असर पार्न सक्छ ।
