काठमाडौँ । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले सरकारले भिजिट भिसा प्रकरण छानविनका लागि उच्चस्तरीय आयोग गठन नगरे आफूहरुको सडक आन्दोलनमा जान बाध्य हुने चेतावनी दिएका छन् । झापामा सञ्चारकर्मीसँग कुराकानी गर्दै लिङदेनले यस्तो बताएका हुन् ।
उनले आफूले भिजिट भिसा प्रकरणमा छानविन समिति गठन गर्न माग गरेको र सो मागबाट पछि नहट्ने पनि बताएका छन् । बरु आवश्यक परे राष्ट्रिय स्वतन्त्र पार्टीसहित आफ्नो पार्टी सडक आन्दोलनमा जानसक्ने लिङदेनले चेतावनी दिएका छन् ।
अध्यक्ष लिङदेनले आफूहरुले सदन अवरुद्ध गरे पनि त्यसलाई बेवास्ता गर्ने र अघि बढाउने काम गरेको भन्दै सभामुख देवराज घिमिरेको भुमिकाप्रति पनि असन्तुष्टि व्यक्त गरेका छन् । आफूहरुको मागलाई सरकारले पनि उपेक्षा गरेको उनको आरोप छ । उनले उक्त प्रकरणमा छानविनका लागि गृहमन्त्री रमेश लेखकले राजीनामा दिएर सहजता प्रदान गर्नुपर्ने पनि बताएका छन् ।
त्यस्तै, लिङदेनले फरक प्रसंगमा आफूले पार्टीमा नयाँ साथीहरुलाई जिम्मेवारी दिने क्रममा गल्ती भए सच्चिएर अघि बढ्न तयार रहेको पनि बताएका छन् ।
