काठमाडौँ । काठमाडौँ कोटेश्वर बस्ने जमुनादेवी पराजुलीकी नातिनी अष्ट्रेलिया छिन् । बिहीबार बेलुकी नातिनीसँग कुरा गर्दा कुरा उठ्यो, ‘अब नेपालमा मेसेन्जर चल्दैन, फेसबुक पनि चल्दैन । भाइबर डाउनलोड गर्नू ।’
७४ वर्षीया पराजुलीलाई भाइबर भन्ने थाहा नै थिएन । उनलाई मेसेन्जर पनि थाहा छैन । मेसेन्जरबाट गरिने भिडियो कललाई उनी फेसबुकबाट कुरा गरेको भन्छिन् । तर फेसबुक र मेसेन्जर नै नचल्ने भएपछि अहिले उनलाई नातिनीसँग कुरा हुन नसक्ने हो कि भन्ने चिन्ता छ ।
यतिमात्र होइन, फेसबुकमा उनी नातिनीका फोटाहरु हेर्थिन् । उनलाई लागेको छ, सरकारले यो सब बन्द गरेर बुडाबुडीलाई दुख दियो । ‘भत्ता पनि नदिने हल्ला गर्थे, अहिले फेसबुक बन्द गर्ने रे । यो सरकारले बस्न खान नदिने भयो ।’ उनी सुनाउँछिन् ।
सरकारले सूचीकरणमा नआउँदा फेसबुक बन्द भएकोबारे उनको तर्क फरक छ । ‘सरकारले भन्ने बित्तिकै विदेशी नेपालमा आउँछ । हाम्रो मन्त्रीको खटनपटनमा फेसबुक बस्छ त ?’ उनी सोध्छिन् । अहिले उनलाई एउटै प्रश्नले पिरोलेको छ- ‘फेसबुकमा नातिनी आउँथी, अव आउँदिन ?’
पराजुली त प्रतिनिधि पात्र मात्र हुन् । अहिले धेरै वृद्धवृद्धालाई फेसबुक बन्द हुने खबरले पिरोलेको छ । दशैं आउनै लाग्दा धेरैले विदेशमा हुने आफन्तलाई सामाजिक संजालमार्फत नै खुसी बाँड्थे, तर त्यो रंग हराउने भएको छ । यही पीरमा वृद्धवृद्धाहरू छन् ।
सरकारले भने सूचीकरणमा नआएको भन्दै फेसबुक, मेसेन्जर, युट्युब लगायतका प्लेटफर्म बन्द गर्न सम्बन्धित पक्षलाई निर्देशन दिइसकेको छ । यसअघि सरकारले टिकटक बन्द गरेर पछि खोलेको थियो ।
