काठमाडौँ । पछिल्लो समय भिजिट भिसामा बेलायत गएर उतै लुक्ने नेपालीहरु बढेका छन् । अन्तराष्ट्रिय सञ्चारमाध्यमका अनुसार यसरी भिजिट भिसामा बेलायत पुगेर लुक्नेहरुको संख्या लाखौँ छ । 

तर, घुम्न भन्दै भिजिट भिसामा बेलायत गएर लुक्ने नेपालीको संख्या कति छ ? भन्ने ठ्याक्कै तथ्यांक कतै छैन । यद्यपि घुम्न भन्दै बेलायत पुगेर नफर्किने बरु उतै लुकेर बस्ने नेपालीको संख्या हजारौँ रहेको बताइएको छ ।

यसो त हाल विभिन्न एजेन्टहरुले भिजिट भिसामा नेपालीहरुलाई बेलायत पठाउने काम गर्दै आएका छन् । यसरी बेलायत पुर्याएबापत उनीहरुले प्रतिव्यक्ति २५ लाख रुपैयाँसम्म लिने गरेको पनि पाइएको छ । ती एजेन्टहरुले २५ लाख रुपैयाँ लिएर नेपालीहरुलाई ६ महिनाका लागि भिजिट भिसामा बेलायत पठाउने गर्छन् । 

तर, बेलायत पुगिसकेपछि भिजिट भिसाको अवधि सकिएपछि पनि उनीहरु अवैध रुपमा बेलायतमै बस्ने गरेको खुलेको छ । नेपाली मात्र नभएर बेलायतमा अन्य मुलुकका नागरिक पनि भिजिट भिसामा गएर उतै लुक्ने गरेको बेलायती रिपोर्टले पुष्टि गरेको छ । यसरी बेलायतमा अवैध आप्रवासीको संख्या बढेपछि बेलायतले अवैध आप्रवासीलाई देश निकाला गर्ने तयारी गरेको छ । हाल बेलायतमा विभिन्न राजनीतिक दलहरुले अवैध आप्रवासीलाई देश निकाला गर्ने विषयलाई चुनावी एजेन्डा नै बनाउन थालेका छन् ।