काठमाडौँ । दुसित थानी हिमालयन रिर्सोटले आईपीओ जारी गर्ने भएको छ । कम्पनीले निकट भविष्यमा सर्वसाधारणका लागि आईपीओ जारी गर्ने भएको हो ।
रिसोर्टले आईपीओ जारी गर्नका लागि सिटिजन्स क्यापिटल लिमिटेडलाई बिक्री प्रबन्धक नियुक्त गरेको छ । बिक्री प्रबन्धक नियुक्ति सम्बन्धि सम्झौतापत्रमा दुसित थानी हिमालयन रिर्सोटको तर्फबात अख्तियार प्राप्त प्रबन्ध निर्देशक रमेश कुमार हमाल र सिटिजन्स क्यापिटल लिमिटेडका तर्फबाट प्रमुख कार्यकारी अधिकृत सबिर बादे श्रेष्ठले हस्ताक्षर गरेका हुन् ।
उक्त सम्झौता अनुसार सिटिजन्स क्यापिटलले दुसित थानी हिमालयन रिर्सोट (ओमस्टोन होटेल्स लिमिटेड) को प्राथमिक सेयर सार्वजनिक निष्काशनको लागि बिक्री प्रबन्धकको कार्य गर्नेछ । उक्त समारोहमा संस्थापकको तर्फबाट प्रमुख विदेशी लगानीकर्ता विष्णु मोरको उपस्थिती रहेको थियो ।
सन् २०२३ को चौथो त्रैमासिकदेखि सञ्चालनमा आएको दुसित थानी हिमालयन रिर्सोट काभ्रेपलाञ्चोकस्थित पात्लेखेत, धुलिखेलमा अवस्थित प्रसिद्ध थाई होटल ब्रान्ड दुसित इन्टरनेशनलको प्रमुख लक्जरी रिसोर्ट हो ।
हिमालय र उपत्यकाको मनोरम दृश्यसहितको पहाडको शिरमा रहेको दुसित थानी हिमालयन रिर्सोट अन्तराष्ट्रिय ब्रान्डको संरचना र प्रविधि मापदण्डमा निर्मित छ । दुसित थानीले नेपालसहित विभिन्न १८ वटा देशमा आतिथ्य सेवा प्रदान गर्दै आइरहेको छ र नेपालमा दुसित थानी हिमालयन रिर्सोट (ओमस्टोन होटेल्स लिमिटेड) ले यसको प्रतिनिधित्व गरेको छ ।
राजधानी काठमाडौंबाट करिब ३८ कि.मि. मा रहेको दुसित थानी हिमालयन रिर्सोटमा शान्तपूर्ण तथा रमणीय वातावरणमा विभिन्न संघ-संस्थाले आफ्नो सम्मेलन, सेमिनार तथा कार्यक्रम पनि गर्ने गरेका छन् ।
सिटिजन्स क्यापिटलले वित्तीय परामर्श, लगानी व्यवस्थापन र म्युचुअल फण्डमा निरन्तर नयाँ आयामहरु थप्दै ग्राहकलाई पूर्ण वित्तीय सेवा प्रदान गर्दै आइरहेको छ ।
