काठमाडौं । नवनियुक्त गृहमन्त्री ओमप्रकाश अर्यालले राष्ट्रिय शोक मनाउने र राष्ट्रिय झण्डा आधा झुकाउने निर्णय गरेका छन् । पदभार ग्रहण गर्दै अर्यालले जेनजी प्रदर्शनका क्रममा ज्यान गुमाउने प्रदर्शनकारी र सुरक्षा निकायको कर्मचारीको सम्मान स्वरुप राष्ट्रिय शोक मनाउने र राष्ट्रिय झण्डा आधा झुकाउने निर्णय गरेका हुन् ।

त्यस्तै, उनले मृतकहरुको परिवारलाई काजकिरिया वापत प्रति मृतक रु एक लाख उपलब्ध गराउने र परिवारको सदस्यहरुको आग्रह अनुसार शवहरुको व्यवस्थापनको लागि निःशुल्क सवारी साधन एवम् दुर्गमको हकमा हेलिकप्टरको व्यवस्थापन गर्ने बताएका छन् ।

उनले अब पुरानै परपाटीबाट सोचेर काम गर्न नहुने भन्दै अहिलेको अवस्थालाई सुधार गर्न राज्यको मात्र होइन सबैको व्यवहार र आचरणको पनि पुनसंरचना गरेर अगाडि बढ्नुपर्ने बताए । उनले भने, ‘हामीले पूरानै परपाटीबाट सोचेर हुदैँन् । अहिले जुन विद्रोह भयो त्यो विद्रोहले कतिपय संस्थाहरुमा विनाश पनि गरेको छ । यसलाई सुधार गर्नुपर्छ र राज्यको मात्र होइन हाम्रो व्यवहार र आचरणको पनि पुनसंरचना गरेर अगाडि बढ्नु पर्छ ।’