काठमाडौँ । डिजिटल वालेट खल्ती टू खल्ती रकम ट्रान्सफर गर्दा अब छुट्टै शुल्क नलाग्ने भएको छ । दशैँमा दक्षिणा तथा अन्य रकम लेनदेनलाई सहज बनाउन खल्तीले यस्तो सुविधा ल्याएको हो । 

योसँगै अब खल्ती प्रयोगकर्ताले खल्ती टू खल्ती रकम ट्रान्सफर गर्दा अतिरिक्त शुल्क तिर्नु नपर्ने भएको छ । 

यसो त यसअघि खल्तीले खल्तीबाट खल्ती एकाउन्टमै रकम ट्रान्सफर गर्दा तीन पटकसम्म निःशुल्क सुविधा दिँदै आएको थियो । तर, एकदिनमै तीन पटक भन्दा बढी रकम ट्रान्सफर गर्नुपरे वा ठूलो रकम ट्रान्सफर गर्नुपरे १० रुपैयाँ शुल्क लिने गरेको थियो । 

तर, अब भने खल्ती टू खल्ती जति पटक कारोबार गरे पनि कुनै अतिरिक्त शुल्क नलाग्ने भएको छ । दशैँ हुने पारिवारिक जमघट, रमाइलो र दक्षिणा आदानप्रदानको संस्कृतिलाई डिजिटलाइज गर्न र थप सहज बनाउन यस्तो सुविधा ल्याइएको खल्तीले जनाएको छ ।