काठमाडौँ । सागर डिष्टिलरी लिमिटेडले आगामी भदौ २५ गतेदेखि सर्वसाधारणका लागि आइपिओ निष्कासन गर्ने भएको छ । कम्पनीले अंकित मूल्य प्रतिकित्ता १०० रुपैयाँका दरका ११ लाख ९० हजार ६४० कित्ता शेयर जारी गर्दै ११ करोड ९० लाख ६४ हजार रुपैयाँ बराबरको पूँजी संकलन गर्नेछ ।

उक्त आइपिओमा सामूहिक लगानी कोषका लागि ७२ हजार ६०० कित्ता र कम्पनीका कर्मचारीका लागि ४३ हजार ५६० कित्ता शेयर छुट्याइएको छ । बाँकी शेयर सर्वसाधारणका लागि खुला हुनेछ । 

लगानीकर्ताले न्यूनतम १० कित्ता र अधिकतम १० हजार कित्तासम्मका लागि आवेदन दिन सक्नेछन् । आवेदन नेपाल धितोपत्र बोर्डबाट स्वीकृत आस्बा सदस्य बैंक तथा वित्तीय संस्थाहरुको शाखा कार्यालयमार्फत तथा ‘मेरो सेयर’ अनलाइन प्रणालीमार्फत गर्न सकिनेछ ।

मुक्तिनाथ क्यापिटल लिमिटेडले यस आइपिओको निष्कासन तथा बिक्री प्रबन्धकको जिम्मेवारी लिएको छ । आइपिओ निष्कासन छिटोमा भदौ २९ गते र ढिलोमा असोज ३ गते बन्द हुने जनाएको छ । यसअघि कम्पनीले पहिलो चरण अन्तर्गत वैदेशिक रोजगारीमा रहेका नेपालीहरूका लागि आइपिओ जारी गरेको थियो ।