काठमाडौँ । सरकारले विभिन्न सामाजिक सञ्जालमा लगाएको प्रतिबन्धमा सामाजिक सञ्जालका रुपमा नभई अनलाइन मिडियाका रुपमा दर्ता भएको हाम्रो पात्रो पनि परेको छ । जबकि हाम्रो पात्रो सूचना तथा प्रसारण विभागमा अनलाइन मिडियाका रुपमा दर्ता छ भने प्रेस काउन्सिल नेपालमा पनि अनलाइन मिडियाकै रुपमा सूचीकृत छ । तर सरकारले नै जबरजस्ती हाम्रो पात्रोलाई सोसल मिडियाका रुपमा चलेको र सूचीकरणमा नआएको भन्दै बन्द गराउन निर्देशन दिएको छ ।
सरकारको निर्णयपछि हाम्रो पात्रो सूचीकरणमा त आएको छ, तर सोसल मिडिया नै नरहेको हाम्रो पात्रोलाई सरकारले सोसल मिडिया भनेपछि हाम्रो पात्रोका संचालकहरु नै छक्क परेका छन् । हाम्रो पात्रो कसरी सोसल मिडिया भयो भन्ने विषयमा हाम्रो पात्रोकै संचालकहरु अनविज्ञ रहेको पाइएको छ ।
हाम्रो पात्रोकी प्रतिनिधि सुदीना गौतमले सामाजिक संजालमार्फत हाम्रो पात्रो २०१६ देखि नै दर्ता भएर चलेको, र सरकारले हाम्रो पात्रोलाई प्रतिबन्ध नगर्ने बताएकी छिन् । उनले हाम्रो पात्रो नाम लिन नमिलेका कारण कम्पनीको नाम भने फरक भएको तर आफुहरु निर्वाद चलिरहेको बताएकी हुन् ।
हाम्रो पात्रोका प्रतिनिधिहरुले पनि आफुहरु सन् २०१६ देखि नै दर्ता भएर चलेको बताएका छन् । समाचारहरु पढ्न, र रेडियो सुन्न निकै चर्चित प्लेटफर्मलाई सरकारले सामाजिक संजाल भनेर प्रतिबन्धको सूचीमा राख्दा भने हाम्रोपात्रोका संचालक र कर्मचारीहरु नै छक्क परेका छन् भने यसले सरकारले सामाजिक संजाल भनेको के हो नै नबुझेको देखिएको प्रष्ट भएको चर्चा सुरु भएको छ ।
हाम्रो पात्रोलाई सामाजिक संजाल भनेर सूचीकरण नभएको भन्दै बन्द गर्न उर्दी जारी गर्दा सोही प्रकृतिको नेपाली पात्रोका विषयमा भने सरकार बोलेको छैन । यता हाम्रो पात्रोलाई सामाजिक संजाल देख्ने सरकारले अमेरिकी राष्ट्रपति डोनाल्ड ट्रम्पले संचालन गरेको र नेपालमासमेत चलिरहेको ट्रुथ सोसललाई भने सामाजिक संजालकै मान्यता नदिएको र प्रतिबन्धको सूचीमा नराखेको पाइएको छ ।
