काठमाडौँ । वैदेशिक रोजगारीका लागि विभिन्न देश पठाउने भन्दै रकम ठगी गर्ने दुई जना पक्राउ परेका छन् । राम्रो काम र आकर्षक तलबको प्रलोभनमा पारेर रकम ठगी गर्ने २६ वर्षीय कार्तिक कुमार चौधरी र २८ वर्षीय मनोज दाहाल पक्राउ परेका हुन् ।
काठमाडौँ उपत्यका अपराध अनुसन्धान कार्यलयबाट खटिएको प्रहरी टोलीले चौधरीलाई ललितपुर जिल्ला महालक्ष्मी नगरपालिका वडा नं. ८ बाट र दाहाललाई काठमाडौँ महानगरपालिका वडा नं. १२ बाट पक्राउ गरेको हो ।
पीडितले दिएको जाहेरीका आधारमा उनीहरुलाई पक्राउ गरिएको प्रहरीले जनाएको छ । प्रहरीका अनुसार चौधरीले सर्बिया पठाउने भन्दै १६ जनाबाट ४२ लाख रुपैयाँ ठगेर सम्पर्क विहीन भएका थिए । त्यस्तै, दाहालले रसिया पठाउने भन्दै १ जनाबाट ८ लाख ५० हजार रुपैयाँ ठगी गरेका थिए ।
पक्राउ परेका दुवैजनालाई थप अनुसन्धान तथा आवश्यक कारवाहीका लागि वैदेशिक रोजगार विभाग पठाईएको छ ।
