काठमाडौँ । प्रधानमन्त्री सुशीला कार्कीको नाममा ‘फेक अकाउन्ट’ खोल्नेलाई कारवाही गरिने भएको छ । प्रधानमन्त्रीको नाम र फोटो दुरुपयोग गरेर अकाउन्ट खोल्ने र भ्रामक सूचना पोष्ट गर्नेलाई कारवाही गर्ने तयारी अघि बढाइएको हो ।
हाल प्रधानमन्त्रीको नाममा ‘फेक अकाउन्ट’ खोलेर भ्रम फैलाउनेहरुमाथि प्रहरीको साइबर ब्युरोले अनुसन्धान अघि बढाइसकेको साइबर ब्युरोका एक अधिकारीले बताएका छन् ।
ती अधिकारीका अनुसार नक्कली अकाउन्ट खोलेर सूचना सम्प्रेषण गर्दै आएका केही व्यक्तिलाई साइबर ब्युरोमा बोलाएर सोधपुछ गरिसकिएको छ भने केहीसँग सम्पर्क गर्ने प्रयास भइरहेको छ । हालसम्म पक्राउ नै भने कसैलाई पनि नगरिएको भन्दै अनुसन्धानपछि कारवाही प्रक्रिया अघि बढाइने ती अधिकारीले बताएका छन् ।
प्रधानमन्त्रीको नाममा खोलिएका २६ वटा ‘फेक अकाउन्ट’ बन्द गर्न सम्बन्धित कम्पनीमा पत्राचार गरेको पनि साइबर ब्युरोले जनाएको छ । केही अकाउन्ट बन्द भइसकेका छन् भने केही बन्द हुने प्रक्रियामा रहेको बताइएको छ ।
