काठमाडौँ । जेन-जी आन्दोलनका क्रममा क्षति भएका संरचना पुनर्निर्माणका लागि स्थापना गरिएको कोषमा साढे ७ करोड रुपैयाँ संकलन भएको छ । हालसम्म उक्त कोषमा कुल ७ करोड ५२ लाख रुपैयाँ संकलन भएको हो ।
कोषमा सो बराबरको रकम जम्मा भएको अर्थमन्त्री रामेश्वर खनालले जानकारी दिएका छन् ।
अर्थमन्त्री खनालका अनुसार सो रकम क्षतिग्रस्त सार्वजनिक संरचनाको विस्तृत इन्जिनियरिङ डिजाइन तयार गर्न, पुनर्निर्माणको प्रतिवेदन तयार गर्न, सार्वजनिक संरचनाको तत्काल मर्मतसम्भार गरी सेवा सुचारु गराउन र आर्थिक पुनरुत्थान, राहत तथा पुनर्स्थापना कार्यक्रममा खर्च गरिनेछ ।
सरकारले देशभरका सरकारी र सार्वजनिक भवनको विस्तृत इन्जिनियरिङ डिजाइन तयार गरी पुर्निर्माणको प्रतिवेदन तयार गर्न साढे ३ करोड रुपैयाँ विनियोजन गरेको छ । त्यस्तै, शहरी विकास तथा भवन निर्माण विभागका लागि २ करोड र संघीय सचिवालय निर्माण तथा व्यवस्थापन कार्यालयमार्फत कार्यान्वयन हुने कार्यक्रमका लागि साढे एक करोड रुपैयाँ विनियोजन गरिएको अर्थमन्त्रीले बताएका छन् ।
