काठमाडौँ । कुमारी बैंकले चालु आर्थिक वर्षको पहिलो त्रैमाससम्मको अपरिस्कृत वित्तीय विवरण प्रकाशित गरेको छ । बैंकले प्रकाशित गरेको वित्तीय विवरण अनुसार पहिलो त्रैमासमा बैंकले कुल १ अर्ब ५ करोड रुपैयाँ खुद नाफा कमाएको छ । यो गत आर्थिक वर्षको तुलनामा २.०१ प्रतिशत कम हो । गत आर्थिक वर्षको सोही अवधिमा बैंकले १ अर्ब ७ करोड रुपैयाँ खुद नाफा कमाएको थियो ।
समीक्षा अवधिमा बैंकको खुद ब्याज आम्दानी ३.७७ प्रतिशतले बढेर २ अर्ब ९१ करोड रुपैयाँ पुगेको छ । त्यस्तै, बैंकको खुद फि तथा कमिसन आम्दानी ३९.६३ प्रतिशतले बढेको छ भने कुल सञ्चालन आम्दानी पनि १३.१२ प्रतिशत बढेको छ ।
समीक्षा अवधिमा बैंकको निष्क्रिय कर्जा बढेको छ । निष्क्रिय कर्जा बढेपछि बैंकको इम्पेयरमेन्ट चार्ज १ अर्ब २६ करोड रुपैयाँ पुगेको छ । इम्पेयरमेन्ट चार्ज बढेकै कारण बैंकको खुद नाफा घटेको हो ।
समीक्षा अवधिमा बैंकको प्रतिसेयर आम्दानी (ईपीएस) ३३ पैसाले घटेर १६ रुपैयाँ ११ पैसामा सीमित भएको छ । बैंकको प्रतिसेयर नेटवर्थ १४५ रुपैयाँ २१ पैसा छ भने मूल्य आम्दानी अनुपात ११.२६ गुणा रहेको छ । २६ अर्ब २२ करोड ५८ लाख रुपैयाँ चुक्ता पूँजी रहेको बैंकको जगेडा कोषमा ११ अर्ब ८५ करोड ७० लाख रुपैयाँ सञ्चित छ ।
