काठमाडौँ । ९ किलो बढी यार्सागुम्बासहित काठमाडौँबाट दुई जना पक्राउ परेका छन् । काठमाडौँ उपत्यका अपराध अनुसन्धान कार्यालयले काठमाडौँको नयाँ बजारबाट ३७ वर्षीय चिनियाँ नागरिक एमए मसु र काठमाडौँ-३१ घर भएका ३६ वर्षीय नबिला बानुलाई पक्राउ गरेको हो ।

उनीहरुको साथबाट प्रहरीले ९ किलो ३ सय ६० ग्राम यार्सागुम्बा र २० लाख रुपैयाँ बरामद गरेको छ । 

त्यस्तै, उनीहरुको साथबाट १ सय ५७ किलो बन लसुन, १ सय १ किलो सुकेका किरा, ७ किलो ९ सय ग्राम गुच्ची च्याउ, साढे ७ किलो गुन्द्रुकजस्तो देखिने जडिबुटी र तौल गर्ने मेसिन २ थान बरामद गरेको प्रहरीले जनाएको छ । 

त्यस्तै, १ थान क्याल्कुलेटर, ३ थान मोबाइल पनि बरामद गरिएको प्रहरीले जनाएको छ । हाल पक्राउ परेका दुवैजनालाई थप अनुसन्धान तथा कारवाहीका लागि डिभिजन वन कार्यालय हात्तिसार पठाइएको छ ।