काठमाडौँ । विवाहको सिजन सुरु भएसँगै देशभर सरकारी गाडीको व्यापक दुरुपयोग भएको पाइएको छ । खासगरी स्थानीय तहमा प्रयोग हुने सरकारी गाडीको दुरुपयोग भएको पाइएको हो । 

मंसिर महिना सुरु भएयता ‘हेल्लो सरकार’ मार्फत प्राप्त उजुरीमध्ये अधिकांश उजुरी सरकारी गाडी दुरुपयोगका भएको बताइएको छ । 

उजुरीमाथि गरिएको छानबिनका क्रममा अधिकांश जनप्रतिनिधिले प्रयोग गर्ने गाडी विवाह, व्रतबन्ध लगायतका काममा प्रयोग भएको पाइएको राष्ट्रिय सतर्कता केन्द्रले गरेको अनुसन्धानले देखाएको छ । यतिसम्म कि सरकारी गाडी मलामी, व्यक्तिगत घुमघाम र घरायसी प्रयोजनमा समेत प्रयोग भएको अनुसन्धानबाट खुलेको छ । 

सरकारी गाडीको दुरुपयोग भएको अनुसन्धानले पुष्टि गरेपछि संघीय मामिला तथा सामान्य प्रशासन मन्त्रालयले ७ सय ५३ पालिकालाई सरकारी गाडी र सुविधाको दुरुपयोग नगर्न निर्देशन दिएको छ । त्यसका बावजुत पनि कसैले सरकारी गाडीको दुरुपयोग गरेको पाइए कारवाही गर्ने मन्त्रालयले चेतावनी दिएको छ ।