काठमाडौँ । व्यवसायी दुर्गा प्रसाईंले ६ लाख ऋणीलाई कालोसूचीबाट हटाउन माग गरेका छन् । उनले परिस्थितिवस् ऋण तिर्न नसकेर ‘ब्ल्याक लिष्ट’मा परेका व्यापारी, यातायात व्यवसायीसहित बैंक, लघुवित्त र सहकारीको कालोसूचीमा परेका ६ लाख ऋणीलाई कालोसूचीबाट हटाउन माग गरेका हुन् ।

‘बैंक, लघुवित्त र सहकारीबाट कालोसूचीमा परेका ऋणीको संख्या करिब ६ लाख छ । उनीहरुलाई कालोसूचीबाट हटाउनुपर्छ ।’, प्रसाईंले भने, ‘अब कसैलाई पनि कालोसूचीमा राख्नुभएन । कसैलाई पनि ३५ दिने सूचना काट्नु भएन ।’

त्यस्तै, प्रसाईंले बैंक र व्यवसायी छुट्याउनुपर्ने पनि माग गरेका छन् । ‘बैंक नेपाली जनताको हुनुपर्ने हो । तर अहिले सीमित व्यक्तिको हातमा बैंक छ ।’, उनले भने, ‘बैंक, इन्स्योरेन्स, रि-इन्स्योरेन्स, व्यापार, सेयर कम्पनी सबै एउटैको कब्जामा छ । त्यसैले बैंक र व्यवसायी छुट्याउनुपर्छ ।’

त्यस्तै, प्रसाईंले अर्को व्यवस्था नहुन्जेलसम्मका लागि भूमिहीन सुकुम्बासी र कवाड व्यवसायीलाई हटाउने काम बन्द गर्न पनि माग गरेका छन् ।