काठमाडौँ । चैतन्य पाठशालाले गणित शिक्षक मागेको छ । सुदूरपश्चिम प्रदेशको कैलालीमा रहेको चैतन्य पाठशालाले खानबस्नको व्यवस्थासहित एक लाख रुपैयाँ तलब दिने भन्दै एकजना गणित शिक्षक मागेको हो । 

पाठशालाले सामाजिक सञ्जाल फेसबुकमा एक सूचना पोष्ट गर्दै कक्षा पाँचदेखि कक्षा दशसम्म पढाउने दक्ष गणित शिक्षकका लागि दरखास्त माग गरेको छ । 

पाठशालाका प्रिन्सिपल प्रेमनिधि ओझाका अनुसार दक्ष र योग्यता पुगेका नेपाली नागरिकले आवेदन दिन सक्नेछन् । छनोट शिक्षकले कक्षा पाँचदेखि कक्षा दशसम्म पठाउनुपर्नेछ । ती शिक्षक बिहानदेखि साँझसम्म विद्यालयमै बस्नुपर्ने ओझाले बताए । 

शिक्षकलाई खाना र बस्नको सुविधा पनि पाठशालाले दिने उनको भनाई छ । उक्त दरखास्तमा मंसिर २९ गतेसम्म आवेदन दिन सकिनेछ । चैतन्य पाठशालामा प्रीस्कुलदेखि कक्षा १२ सम्म पढाई हुन्छ ।