काठमाडौँ । नेपाल बीमा प्राधिकरणका कर्मचारीहरु हड्तालमा उत्रिएका छन् । प्राधिकरणसँग विभिन्न सात बुँदे माग राख्दै प्राधिकरणका कर्मचारीहरु पुस १ गते (मंगलबार)देखि हड्तालमा उत्रिएका हुन् । 

कर्मचारीको हड्ताललाई नेपाल बीमा प्राधिकरण कर्मचारी संघ र नेपाल बीमा प्राधिकरण कर्मचारी युनियनले अगुवाई गरेको छ । 

पुस १ गतेदेखि हड्ताल सुरु गरेका प्राधिकरणका कर्मचारीले काम दैनिक काम प्रभावित नहुनेगरी हातमा कालोपट्टी बाँधेर काम गर्ने बताएका छन् । उनीहरुले पुस १ गतेदेखि नै कालोपट्टी बाँधेर काम गर्न सुरु गरेका छन् । 

हड्ताल सुरु गर्दै कर्मचारी संघ र युनियनले प्राधिकरणका अध्यक्षलाई पत्र लेख्दै हड्ताल सुरु भएको औपचारिक जानकारी गराएका छन् । माग पूरा नहुन्जेल हड्ताल जारी रहने कर्मचारीहरुले बताएका छन् ।