काठमाडौँ । राष्ट्र, राष्ट्रियता, धर्म, संस्कृति र नागरिक बचाउ महाअभियान अन्तर्गतको ऋणी एशोसिएसन नेपालका संयोजक देवी संग्रौलाले महालक्ष्मी विकास बैंकको टर्चरका कारण ऋणीको ज्यान गएको दाबी गरेका छन् । अर्थ सरोकारको टेलिभिजन कार्यक्रम ‘तथ्य र तर्क’मा बोल्दै उनले यस्तो दाबी गरेका हुन् ।

संग्रौलाका अनुसार महालक्ष्मी विकास बैंकबाट चितवनको टाँडीका एक ऋणीले ५९ लाख ५० हजार ऋण लिएका थिए । आर्थिक मन्दी र बैंकको चर्को ब्याजका कारण किस्ता अनियमित हुँदा बैंकले दिएको टर्चरले ऋणीको मृत्यु भएको संग्रौलाले दाबी गरेका छन् । मृत्यु भएका व्यक्ति पूर्व एसएसपीसमेत रहेको सँग्रौलाको दाबी छ । 

उनले बैंक र तस्करको मिलेमतोमा ऋणीको मृत्युपछि धितोमा राखिएको १२ करोड बराबरको सम्पत्ति ६० लाखमा लिलाम गरिएको बताए । ‘६-७ करोड बराबर पर्ने २३ कठ्ठा जग्गा बैंकले तस्करसँग मिलेर ६० लाखमा लिलाम गर्यो ।’, उनले भने, ‘जसले ६० लाखमा बैंकबाट जग्गा लियो, उसले अर्को व्यक्तिलाई १ करोड ५० लाखमा बेचेको छ । अहिले डिआरडीले पत्र पठाएर उनै ऋणीलाई ४७ लाख तिर्नु भनेको छ । यो कस्तो न्याय हो ?’

त्यस्तै, उनले महालक्ष्मी विकास बैंक तस्करहरुको बैंक भएको पनि आरोप लगाएका छन् । ऋणीलाई कालोसूचीमा राखेर सम्पत्ति लिलाम गरिसकेपछि पनि बैंकले ४७ लाख तिर्नु भन्दै डिआरटीबाट पत्र पठाएर परिवारलाई नै बिचल्ली बनाएको संग्रौलाको आरोप छ ।

‘६ करोडको सम्पत्ति ६० लाखमा बैंकले खायो । ऋणीको मृत्यु भयो । अझै पनि बैंकले ऋणीको परिवारलाई टर्चर दिन छोडेको छैन ।’, उनले भने, ‘अझै पनि महालक्ष्मी विकास बैंक सच्चिएन भने सिइओ, कर्मचारीहरु भाग्ने दिन आउँछ ।’