काठमाडौँ । शिक्षा, विज्ञान तथा प्रविधिमन्त्री महावीर पुनले ‘ओली कुटी’ प्रति व्यङ्ग्य गर्दै नक्सा डिजाइन गर्ने इन्जिनियरलाई कारवाही गर्नुपर्ने बताएका छन् । आइतबार सामाजिक सञ्जाल फेसबुकमा पोष्ट गर्दै मन्त्री पुनले यस्तो लेखेका हुन् ।

‘यो नक्सा डिजाइन गर्ने इन्जिनियरलाई सख्त कारवाही गर्नुपर्छ ।’, उनले लेखेका छन्, ‘अनी घोर बेइज्जती तथा मानहानीको मुद्दा लगाउनुपर्छ भन्ने मेरो माग छ ।’

व्यङ्ग्य शैलीमा पोष्ट गरिएको महावीर पुनको उक्त पोष्टमा हाकिमले दुई जना बस्ने कुटीको नक्सा बनाउन भनेपछि इन्जिनियरले दरबारको नक्सा बनाउनु हुन्छ त ? भन्दै प्रश्न गरेका छन् । साथै उनले पोष्टको अन्तिममा ‘एक छिन रमाइलो’ पनि लेखेका छन् । 

जेन-जी आन्दोलनमा बालकोटस्थित घर जलेर नष्ट भएपछि हाल एमाले अध्यक्षसमेत रहेका केपी शर्मा ओलीको भक्तपुरको गुण्डुमा नयाँ निवास बनाइँदैछ ।  ‘ओली कुटी’ नाम दिइएको उक्त निवासको शिलान्यास मंसिर १८ गते गरिएको थियो । त्यसयता उक्त ‘ओली कुटी’को डिजाइनको तस्विर सामाजिक सञ्जालमा भाइरल छ ।