काठमाडौँ । कर्मचारी सञ्चय कोषले नयाँ ब्याजदर घोषणा गरेको छ । कोषले आर्थिक वर्ष २०८२/८३ मा कोष तथा निवृत्तभरण कोष रकममा प्रदान गर्ने र सञ्चयकर्ता सापटीमा लिने वार्षिक ब्याजदर पुनरावलोकन गरी नयाँ ब्याजदर घोषणा गरेको हो ।

कोषले घोषणा गरेको नयाँ ब्याजदर पुष १ गतेदेखि लागू हुने कोषले जनाएको छ । 

कोषले न्यूनतम ४.२५ देखि अधिकतम ७.२५ प्रतिशतसम्म ब्याजदर घोषणा गरेको छ । कोषका अनुसार सञ्चय कोष र निवृत्तिभरण कोषमा ४.२५ प्रतिशत ब्याजदर प्रदान गर्नेछ । 

त्यस्तै, कोषले सञ्चयकर्ता सापटीमध्ये विशेष सापटीको ब्याजदर ५.७५ प्रतिशत, घर सापटी, शैक्षिक सापटी र घर मर्मत सापटीमा ७ प्रतिशत, जग्गा खरिद सापटी र सरल सापटीमा ७.२५ प्रतिशत ब्याजदर लिने घोषणा गरेको छ । 

त्यस्तै, विशेष सापटी बाहेकका धितोमा आधारित सापटीको ब्याज नियमित रुपमा चुक्ता गर्ने सञ्चयकर्ताको हकमा ०.२५ प्रतिशतले छुट दिने पनि कोषले घोषणा गरेको छ ।