काठमाडौँ । साउदी अरेबियाले १० हजार भन्दा बढी विदेशी नागरिकलाई देश निकाला गरेको छ । साउदीले सन् २०२६ जनवरीको पहिलो हप्तामै १० हजार भन्दा बढी विदेशी नागरिकलाई देश निकाला गरेको हो ।

अवैध रुपमा बसोबास गर्दै आएका, श्रम कानून र सीमा कानून उल्लंघन गरेकाहरुलाई देश निकाला गरेको साउदी अरेबियाले जनाएको छ । 

साउदीको गृह मन्त्रालयका अनुसार यस अवधिमा मात्र १८ हजार ८ सय ३६ जना पक्राउ परेका छन् । उनीहरुलाई सुरक्षा बल र सरकारी एजेन्सीहरु सम्मिलित अभियानमा पक्राउ गरिएको मन्त्रालयले जनाएको छ । 

पक्राउ परेकामध्ये ११ हजार ७ सय १० जनाले आवास कानून उल्लंघन गरेको र ४ हजार २ सय ३९ जनाले सीमा कानून उल्लंघन गरेको मन्त्रालयले जनाएको छ । त्यस्तै, पक्राउ परेका २ हजार ८ सय ८७ जनाले श्रम कानून उल्लंघन गरेका थिए । ती मध्ये १० हजार भन्दा बढीलाई देश निकाला गरिसकेको र बाँकीलाई पनि देश निकाला गर्ने तयारी रहेको साउदीको गृह मन्त्रालयको भनाई छ ।