काठमाडौँ । सुपर मादी हाइड्रोपावरको नाफा बढेको छ । कम्पनीले प्रकाशित गरेको चालु आर्थिक वर्षको दोस्रो त्रैमाससम्मको अपरिस्कृत वित्तीय विवरण अनुसार कम्पनीको खुद नाफा ६९.२५ प्रतिशतले बढेको हो । कम्पनीले दोस्रो त्रैमाससम्ममा कुल २० करोड ५९ लाख रुपैयाँ खुद नाफा कमाएको छ । जबकी कम्पनीले गत आर्थिक वर्षको सोही अवधिमा १२ करोड १७ लाख रुपैयाँ खुद नाफा कमाएको थियो । 

समीक्षा अवधिमा कम्पनीको विद्युत बिक्री आम्दानी ११.०२ प्रतिशतले बढेर ६७ करोड २८ लाख रुपैयाँ पुगेको छ । त्यस्तै, कम्पनीको कुल नाफा ८.७१ प्रतिशतले बढेको छ । 

कम्पनीले प्रकाशित गरेको वित्तीय विवरण अनुसार कम्पनीको अन्य सञ्चालन खर्च २६.१० प्रतिशत र वित्तीय खर्च १४.८३ प्रतिशतले घटेको छ । 

नाफासँगै समीक्षा अवधिमा कम्पनीको प्रतिसेयर आम्दानी (ईपीएस) पनि बढेको छ । यस अवधिमा कम्पनीको ईपीएस ७ रुपैयाँ ६४ पैसा बढेर १८ रुपैयाँ ६८ पैसा पुगेको छ । समीक्षा अवधिमा कम्पनीको प्रतिसेयर नेटवर्थ ११५ रुपैयाँ ७६ पैसा रहेको छ भने मूल्य आम्दानी अनुपात ३१.८४ गुणा छ ।

२ अर्ब २० करोड ५० लाख रुपैयाँ चुक्ता पूँजी रहेको यस कम्पनीको जगेडा कोषमा ३४ करोड ७४ लाख रुपैयाँ सञ्चित छ ।