काठमाडौँ । राष्ट्रिय स्वतन्त्र पार्टी (रास्वपा)की युवा नेतृ रुबिना आचार्यसँग भारी मतले हारेपछि नेपाली काँग्रेसका नेता डा. शेखर कोइरालाले युवाहरु परिवर्तनको वाहक भएको बताएका छन् ।

कुल १२ हजार ८ सय ५० मत ल्याएका कोइरालालाई हराएकी रास्वपाकी आचार्यले ५५ हजार ५ सय १३ मत पाएकी छिन् ।

३१ वर्षीया आचार्यसँग लज्जास्पद हार व्यहोरेका कोइरालाले सामाजिक सञ्जाल फेसबुकमार्फत हार स्वीकार गर्दै आचार्यलाई बधाई दिएका छन् । सँगै उनले युवाहरु परिवर्तनको वाहक भएको पनि बताएका छन् ।

‘…लोकतान्त्रिक पद्धतिलाई आत्मसात गरेर सक्षम र योग्य युवाहरु भर्खरै सम्पन्न निर्वाचनमा विजयी हुनुभएको छ ।’, उनले लेखेका छन्, ‘युवाहरु जो यो राष्ट्रको परिवर्तनका वाहक हुन, भावी संसदमा हामी नीति निर्माणमा पुगेको देख्नेछौँ । यो खुशीको कुरा हो ।’