काठमाडौँ । इरानको सबैभन्दा ठूलो प्राकृतिक ग्यास भण्डार क्षेत्रमा आक्रमण गरिएको छ । इजरायल र अमेरिकाले इरानको साउथ पर्स ग्यास फिल्डमा आक्रमण गरेको हो । 

इरानको ठूलो ग्यास भण्डार क्षेत्रमा इजरायल-अमेरिकाले आक्रमण गरेपछि मध्यपूर्वको तनाव झन् उत्कर्षमा पुगेको छ । आफ्नो सबैभन्दा ठूलो ग्यास भण्डार क्षेत्रमा आक्रमण भएपछि जवाफी हमलामा इरानले कतारमा मिसाइल खसालेको छ । 

इरानले कतारको रास लाफान औद्योगिक क्षेत्रमा मिसाइल खसालेको हो । मिसाइल आक्रमणबाट कतारको मुख्य ग्यास प्रशोधन प्लान्टमा आगलागी हुँदा ठूलो क्षति भएको कतारको सरकारी पेट्रोलियम कम्पनीले जनाएको छ । 

प्लान्ट पूर्वाधारमा ठूलो क्षति भए पनि मानवीय क्षति भने नभएको बताइएको छ । उक्त आक्रमणलाई कतारले आफ्नो राष्ट्रिय सुरक्षा र क्षेत्रीय स्थिरतामाथि सीधा खतरा भएको बताएको छ ।