काठमाडौँ । श्रम, रोजगार तथा सामाजिक सुरक्षा मन्त्रालयले ‘इन्टर्न’लाई समेत न्यूनतम पारिश्रमिक दिन निर्देशन दिएको छ । सोमबार एक प्रेस विज्ञप्ति जारी गर्दै मन्त्रालयले यस्तो निर्देशन दिएको हो । 

‘इन्टर्न श्रमिक’को रुपमा कार्यरत स्वास्थ्यकर्मी तथा नर्सिङ स्टाफ, शिक्षक, कर्मचारीहरुले तोकिएको न्यूनतम पारिश्रमिक नपाएको भन्दै उजुरी र गुनासो बढेपछि सम्बन्धित संस्थाहरुलाई ‘इन्टर्न’लाई पनि न्यूनतम पारिश्रमिक दिन निर्देशन दिइएको मन्त्रालयले जनाएको छ ।

यसका बाबजुत पनि ‘इन्टर्न’लाई श्रम ऐन, २०७४ को दफा १८ को उपदफा (३) अनुसार तोकिएको न्यूनतम पारिश्रमिक नदिए कारवाही गर्ने मन्त्रालयले चेतावनी दिएको छ । 

त्यस्तै, मन्त्रालयले तालिमी श्रमिकलाई पनि न्यूनतम पारिश्रमिक, बिरामी बिदा, उपदान, सञ्चयकोष, बीमा लगायतका सामाजिक सुरक्षामा कुनै कमी नहुनेगरी सुविधा दिन पनि निर्देशन दिएको छ ।