काठमाडौँ । सार्वजनिक यातायातको भाडा फेरि बढेको छ । इन्धनको मूल्य वृद्धि भएसँगै यातायात व्यवस्था विभागले सार्वजनिक यातायातको भाडा बढाएको हो ।

विभागले बुधबारदेखि लागू हुनेगरी अन्तरप्रदेशमा सञ्चालन हुने सार्वजनिक यातायातको भाडा बढाइएको जनाएको छ ।

विभागका अनुसार अन्तरप्रदेश यात्रुबाहक सवारी, पहाडी बाटोमा सञ्चालन हुने मालबाहक र तराईको बाटोमा सञ्चालन हुने मालबाहक सवारी साधनमा ५ प्रतिशतले भाडा वृद्धि गरिएको जनाएको छ ।

यसो त यसअघि चैत २५ गते सार्वजनिक यातायातको भाडा वृद्धि गरिएको थियो । भाडा वृद्धिपछि फेरि इन्धनको मूल्य बढेको भन्दै सार्वजनिक यातायातको भाडा पनि वृद्धि गरिएको छ । यद्यपि बढेको भाडा विद्युतीय गाडीको हकमा लागू नहुने जनाएको छ ।