काठमाडौँ । व्यवसायी दीपक भट्ट र शुलभ अग्रवाललाई थप १२ दिन हिरासतमा राख्न अदालतले अनुमति दिएको छ । सम्पत्ति शुद्धीकरण (मनी लाउण्डरिङ्ग) तथा सम्बद्ध कसुरको अनुसन्धानका लागि पक्राउ परेका उनीहरुलाई अदालतले पुनः १२ दिनको म्याद थप गरेको हो । 

विशेष अदालत काठमाडौँका न्यायाधीशहरु हेमन्त रावल, डिल्लीरत्न श्रेष्ठ र विदुर कोइरालाको इजलासले अनुसन्धान कार्य जारी राख्न दुवैजनालाई थुनामा राख्न अनुमति दिएको हो । 

अदालतको आदेश अनुसार प्रतिवादी दिपक भट्टको हकमा आज पाँचौँ पटक १२ दिनको म्याद थप गरिएको छ । त्यसैगरी, अर्का प्रतिवादी शुलभ अग्रवालको हकमा छैटौँ पटक १२ (बाह्र) दिनको म्याद थप भएको छ । यो म्याद थप मिति २०८३ साल वैशाख २३ गतेदेखि लागू हुने गरी प्रदान गरिएको हो ।

‘अनुसन्धानका क्रममा सम्पत्ति शुद्धीकरण निवारण ऐन, २०६४’ मा हालै भएको संशोधन र नयाँ अध्यादेशले गरेको कानुनी व्यवस्थालाई ध्यानमा राख्दै यो निर्णय लिइएको देखिन्छ । 

सरकारी वकिलको राय प्रतिवेदन तयार पार्ने, अभियोजन कार्य र केन्द्रीय अनुसन्धान ब्युरोबाट भइरहेको सम्बद्ध कसुरतर्फको अनुसन्धान अझै बाँकी रहेकाले थप समय माग गरिएको थियो । संयुक्त अनुसन्धान टोलीले मुद्दाको गम्भीरता र प्रमाण संकलनको प्रक्रियालाई मध्यनजर गर्दै अनुसन्धान तहकिकात कार्य अगाडि बढाइरहेको छ । विशेष अदालतको प्रशासन शाखाका अनुसार, ऐनको दफा १७ को उपदफा (४) बमोजिम प्रक्रिया पुर्याएर अनुसन्धानका लागि यो म्याद थपको आदेश जारी गरिएको हो ।