काठमाडौँ । स्वतन्त्र सांसद महावीर पुनले वर्तमान सरकारले विज्ञान, प्रविधि र नवप्रवर्तन मन्त्रालय खोल्न नमानेको भन्दै आपत्ति जनाएका छन् । मंगलबार संघीय संसद्को बैठकमा बोल्दै पुनले यस्तो बताएका हुन् । 

उनले सरकारले विज्ञान र नवप्रवर्तनको क्षेत्रलाई उपेक्षा गरेको भन्दै आपत्ति जनाएका छन् । उनले विश्वविद्यालयहरुलाई राजनीतिक प्रभावबाट मुक्त गर्नेगरी सरकारले अध्यादेश ल्याउनु सकारात्मक भएपनि विश्वविद्यालयको कुलपति प्रधानमन्त्री नै रहने व्यवस्था गरिएको भन्दै असन्तुष्टि जनाएका छन् ।

सांसद पुनले विज्ञान, प्रविधि र नवप्रवर्तनको क्षेत्रमा काम गर्न नवप्रवर्तन कोष स्थापना गरिनुपर्नेमा जोड दिएका छन् । ‘विज्ञान, प्रविधि, नवप्रर्तन तथा अनुसन्धान मन्त्रालय छुट्टै खोल्नुपर्छ भन्ने मेरो जुन माग छ, त्यो मागमा सुनुवाइ भइरहेको छैन ।’, उनले भने, ‘प्राधिकरण बाट चलाउन खोजिएको छ । धेरै रुपैयाँ खर्च हुन्छ रे ।’

त्यस्तै, उनले मन्त्रालयमा सञ्चालनका लागि बजेटको आवश्यकता पर्ने र सरकार पन्छिन खोजेको भन्दै विज्ञान र नवप्रवर्तन ठुलो कि २-३ अर्ब रुपैयाँ ठुलो ? भन्दै प्रश्न समेत गरेका छन् ।